کپان، اڑان، تچان باں
من روچ ءَ پدگران باں
پہ دیگر ءَ تہ سر بباں
اے رولہ ءِ بھشتیں چم
اے رنگ ءِ سوزناکیں گم
زرد بیت ءُ سُھر بیت
داں ایر روت تھاری ءَ
ءُ شپ کپیت مئے باری ءَ
سباہ ءِ ٹِک ءَ نوک باں
سپر کناں جَلیں گماں
گوں روچ ءِ زگریں نیت ءَ
وت ءَ چہ کمو در کپاں
ھدا ءِ ھد ءَ سر کپاں
روان باں رواں کناں
تاں بیرگ ءَ من دمبراں
بُن ءَ کپاں ءُ اُورت باں
تھار بیت من کوهن باں
پدا پہ نوکی ءَ زراں
اے کوھن ءُ نوکی ءِ زِه ءَ
شِتگ مئے ھستی ءِ بدن
رُتگ مئے واھگ ءِ چمن
- حماد ھمراز